SEGUNDA REUNIÓN DO CLUB DE LECTURA

 SEGUNDA REUNIÓN DO GRUPO MIXTO DO  CLUB DE LECTURA

O pasado xoves, 30 de novembro, reunímonos de novo os membros do grupo mixto do Club de lectura para comentar o libro, La dependienta, a primeira das dez novelas da escritora xaponesa,  Sayaka Murata,  coa que gañou o prestixioso Premio Akutagawa en 2016 e foi nomeada Muller do Ano pola revista Vogue Japan.

A novela céntrase en Keiko Furukura, unha moza que traballa nunha tenda de conveniencia ou Konbini. Keiko foi vista como unha nena rara xa desde pequena, cando se buscou máis dun problema polas súas saídas de ton. Cóntanolo ela mesma ao comezo da novela: "Nunha ocasión, aínda na escola, pegou aos seus compañeiros cunha pa porque estaban pelexando, en vez de ir buscar axuda. O seu razonamento era claro: se había que separarlles porque se estaban pegando, esa era unha maneira rápida de facelo. Keiko crece cada vez máis ellada do mundo. Ao entrar na universidade e para tentar tranquilizar aos seus pais, preocupados polo futuro da súa estraña filla, Keiko empeza a traballar nun Konbini. Alí ayopa un lugar no que non ten que loitar por "tentar ser normal", senón que simplemente debe seguir o manual do empregado. Con todo, 18 anos despois e xa con 36 anos, Keiko segue traballando no mesmo Kombini, sen demasiados amigos. Keiko é feliz, pero é consciente de que nos está a cumprir co que a sociedade espera dela: agora é unha muller sen traballo estable e sen parella á vista que se está facendo demasiado maior para a sociedade xaponesa.

A novela, en xeral gustou bastante ( máis ao profesorado que ao alumnado). Murata é capaz de contar moitísimas cousas sen contar aparentemente nada. O desenvolvemento da acción é moi breve e a novela céntrase en presentarnos un personaxe e deixarnos que saquemos as nosas propias conclusións sobre ela e a súa vida. Algúns dos membros do club viron na protagonista tendencias psicópatas ( os seus pensamentos sobre como acalar os choros dun bebé son mostra diso), pero a maioría pensamos que tiña algún tipo de autismo. Como lectores sentimos agarimo por ela, sobre todo, cando vemos como tentou adaptar a súa maneira de ser para conseguir formar parte da sociedade.

O que si é evidente, na nosa opinión, é que A dependienta é unha crítica á sociedade actual,  especialmente á  presión que senten tanto homes como mulleres en seguir o camiño establecido, en non saírse da norma e en cumprir coas expectativas. Unha novela moi recomendable!

Na reunión tamén eliximos a próxima lectura, esta vez en galego, A culpa da escritora e periodista, María Solar.

                                    DIFERENTES MOMENTOS DA POSTA EN COMÚN

                                                         A NOSA PRÓXIMA LECTURA

                                          

Posando co libro de María Solar

                                          

PRIMEIRA REUNIÓN

 PRIMEIRA REUNIÓN DO GRUPO MIXTO DE 3º e 4º DA ESO 

O pasado xoves, 19 de outubro,  reunímonos os membros do grupo mixto do club de lectura "Mendebiblos", para dar a benvida aos novos compoñentes do mesmo.

Tras facer as presentacións, cada un deles explicou as súas motivacións para pertencer a este club e as súas  preferencias lectoras.

Finalmente, decidimos a nosa primeira lectura, La Dependienta, unha novela escrita por SayaKa Murata, unha das novas voces na literatura xaponesa contemporánea.

                                                 Elixindo a nosa primeira lectura

POSANDO CO LIBRO ELIXIDO: LA DEPENDIENTA

María, acompañada de Aitana, mostra o libro elixido

COMEZANDO

 EN MARCHA!

Con moita ilusión poñemos en marcha un curso máis o noso club de lectura que continuará a funcionar cos dos grupos: o do primeiro ciclo da ESO ( 1º e 2º) coordinado pola profesora de galego, Ana González Cumplido e o do segundo ciclo da ESO, coordinado pola profesora de Lingua castelá e coordinadora da biblioteca, Clara Martín Corchete.

Deixámosvos o calendario coa data das reunións para os dous grupos.

ÚLTIMA REUNIÓN DO GRUPO DE 1º E 2º DA ESO

  QUINTA REUNIÓN DO GRUPO DE 1º E 2º DA ESO

A quinta e última obra escollida polo clube de 1º e 2º da ESO foi Auto da costureira, unha peza teatral de Manuel María publicada en 1973.

Nas diversas reunións que celebramos desde mediados ata finais do terceiro trimestre, e unha vez repartidos os papeis entre o alumnado, realizamos unha lectura dramatizada da obra da que os alumnos e alumnas participantes gozaron moito. Sen dúbida, tanto esta como a outra obra de teatro que lemos no clube (O achado do castro de Manuel Núñez Singala) foron do agrado do noso alumnado non só polas historias en si mesmas, mais tamén polo entretido e gratificante que resultou representalas

ÚLTIMA REUNIÓN DO CLUB DE LECTURA DE MAIORES

 

ÚLTIMA REUNIÓN DO CLUB

O pasado xoves 15 de xuño, fixemos a última reunión do club de lectura cun almorzo os profesores e alumn@s do club nun restaurante-buffet do Centro Comercial Pontevella.

Rematado o almorzó, nun ambiente distendido ao redor dun café, comentamos o libro de Arantza Portabales, Deixe a súa mensaxe despois do siñal, unha magnífica novela protagonizada por catro mulleres moi diferentes e con idades moi dispares, pero que teñen algo en común, todas deciden deixar mensaxes nos contestadores automáticoa e ó final as súas vidas acabarán cruzándose dalgunha forma.

O libro, en xeral, gustou moito. Ten unha lectura moi áxil, cuns capítulos moi curtos que alternan as voces de catro mulleres onde nos falan dos seus sentimentos máis íntimos, do amor, da culpa, da dor, da traición...

A posta en común do libro foi moi interesante. Cada membro do Club falou do seu personaxe preferido e por que, coincidindo a maioría en Carmela, unha muller entrañable, que aímda que está a morrer, non está disposta a perder o tempo que lle queda.

A lectura do libro é moi recomendable , pero non só para mulleres, porque aínda que as protagonistas son mulleres, non é unha novela de mulleres. Os homes tamén disfrutarán coa súa lectura e quizais eles tamén recoñezan nestas mulleres a outras que se atopan á súa beira.

 

COMIDA

POSTA EN COMÚN

XV XORNADA DOS CLUBS DE LECTURA

O pasado luns, 5 de xuño, celebrouse no Palacio de Congresos de Santiago de Compostela, a reunión anual dos coordinadores dos clubs de lectura dos centros que participamos no programa de Clubs de Lectura da Consellería de Educación.

 Un ano máis as Xornadas cumpriron as expectativas previstas.

 Trala inauguración, fíxose entrega do Premio dos Clubs de Lectura 2023 o escritor Manuel Núñez Singala por ser o autor galego máis lido nos clubs de lectura no curso 2022-2023. Posteriormente falou sobre o teatro, lingua e humor, unha conferencia moi interesante na que contou como os certames literarios foron a causa dos seus comezos no mundo do teatro. 

O programa contou ( entre outros) coa participación do experto en formación lectora Felipe Munita, sesións simultáneas de experiencias de clubs de lectura (teatro, audiovisuais...) e  unha mesa moi interesante de biblioterapia a cargo de Julio Abalde y Carlos Martínez Uzal.

 Os encontros foron pechados pola poeta Olga Novo quen baixo o título "A lectura do infinito" abordou o achegamento á lectura como un acto de vida.

 Parabéns unha vez máis por estas Xornadas e pola boa organización.

FOTOS DOS ENCONTROS

 

Inauguración da Xornada

O escritor Manuel Núñez Singala recolle o seu premio

Manuel Núñez Singala

Charla sobre mediación

A poeta, Olga Novo

Quinta reunión do club de lectura de maiores

 QUINTA REUNIÓN DO CLUB DE LECTURA DE MAIORES

O pasado martes, 23 de maio, reunímonos de novo os integrantes do Club de lectura  de maiores para comentar a novela de Karen M. McManus, Alguien está mintiendo. 

O libro preséntanos a cinco estudantes aparentemente sen nada en común que foron castigados inxustamente por un delito que parace que non cometeron. En metade do castigo un deles, Simon, cae fulminante e inmediatamente os outros catro vense implicados como sospeitosos de asasinato. 

Todos teñen algún motivo para querer velo morto,  posto que Simon creou unha nova app, "Malas linguas", na que se dedicaba a publicar os segredos dos seus compañeiros sen importarlle o dano que puidese causar con isto. 

En xeral,  trátase dunh thriller xuvenil entretenido, de fácil lectura que engancha, sen embargo, á maioría decepcionounos, pois é un libro cheo de clichés. Os protagonistas non poden ser máis esteriotipados: a empollona, o deportista, a rica e popular e o delincuente, o mozo malo que vende drogas. O personaxe que máis nos gustou foi Addy pois é o personaxe que máis evolucionou e que ten unha dura historia detrás.                En canto ó misterio, tampouco encontramos moitas sorpresas. O mellor do libro é, dende o noso punto de vista, que trata temas moi diversos como a violencia de xénero ou a homofobia e convídanos a reflexionar sobre o perigo das redes sociais entre os adolescentes e o uso que se dá de elas. Con todo, é unha novela entretida e recomendable, sobre todo para os fanáticos de Gossip Girl.

 Trala reunión decidimos a próxima lectura,  esta vez en galego. O libro elixido foi Deixe a súa mensaxe despois do sinal, de Arantza Portabales.

Diferentes momentos da reunión

A NOSA PRÓXIMA LECTURA

Parte dos membros do club posando coa nosa próxima lectura.

CUARTA REUNIÓN DO GRUPO DE 1º e 2º DA ESO

CUARTA REUNIÓN DO GRUPO DE 1º e 2º DA ESO

O terceiro libro escollido polo Clube de Lectura de 1º e 2º de ESO foi O achado do castro de Manuel Núñez Singala. Trátase dunha obra de teatro publicada no 1990 que transporta ó lector á Antiga Roma da man dunha serie de personaxes que nos fan botar máis dunha gargallada.

 Na primeira reunión distribuímos os personaxes entre o alumnado e as profesoras e nas seguintes cinco sesións somerxémonos na lectura dramatizada da obra de teatro ata o final da mesma, a cal gozamos de principio a fin.

 O alumnado participou activamente na representación desta obra que xa desde o comezo nos chamou a atención polos nomes dalgúns personaxes como Carmiñae ou Manolitus. Non soan moi romanos, non si? Do mesmo xeito que ocorre cos nomes, o autor utiliza eses xogos coa lingua entre o galego e o latín durante toda a historia. Mais sen lugar a dúbidas o que nos mantivo enganchados á lectura foron todas esas comicamente absurdas que conseguen que non levantemos a mirada do texto.

                                            DIFERENTES MOMENTOS DA REUNIÓN

                                            

CUARTA REUNIÓN DO GRUPO DE MAIORES

 

TERCEIRA REUNIÓN DO GRUPO DO PRIMEIRO CICLO DA ESO

 

TERCEIRA REUNIÓN DO GRUPO DE 1º e 2º DA ESO

A segunda obra escollida polo Club de Lectura de 1º e 2º de ESO foi La Tuneladora de Fernando Lalana,  publicada no ano 2006. A novela narra a misteriosa desaparición dun xove enxeñeiro responsable dunha tuneladora nas obras públicas de Zaragoza e a investigación do caso por parte de Fermín Escartín, o detective ó cargo do mesmo.

Na reunión do 30 de novembro comentamos os tres primeiros capítulos do libro, as sensacións que nos estaba a producir a historia, as sospeitas do que lle podería ter acontecido ó protagonista e as primeiras impresións sobre as novelas de detectives.

Nas posteriores reunións do 15 de decembro e do 17 de xaneiro rematamos de comentar a novela e, sobre todo, destacamos o lento transcorrer da historia ata a metade do libro aproximadamente, momento no que os avances do detective nos somerxen de cheo nas entrañas da desaparición do enxeñeiro e tamén nas entrañas da terra coa tuneladora que dá nome á obra. Así mesmo, salientamos os enxeñosos xogos de palabras que o autor utiliza nos nomes dalgúns personaxes e o inesperado do final, se ben algún alumno e alumna sospeitou o desenlace da desaparición.

A lectura deste libro xerou opinións contrapostas pois foi moi do agrado de parte do grupo interesado neste tipo de xénero literario, mais outra parte do alumnado participante non a gozou tanto; iso si, todos fixemos de detectives e tentamos resolver o caso co avan da lectura.

TERCEIRA REUNIÓN DO GRUPO DE MAIORES

 TERCEIRA REUNIÓN DO CLUB

O pasado xoves 26 de xaneiro, reunímonos de novo os integrantes do club de lectura ( grupo de 3º e 4º da ESO) para comentar a novela , Antes de diciembre, da xoven escritora mallorquina Joana Marcus quen se iniciou como escritora en Wattpad, onde as súas novelas obtiveron diversos recoñecementos e premios.

Antes de diciembre non é o típico libro que elixiríamos para ler no club se non fose pola insistencia do grupo do alumnado e porque queríamos saber por que fíxose tan famoso de súpeto e por que a tantas persoas gustáballes. O resultado foi o esperado ao alumnado encantoulles e ao sector profesorado deixounos indiferentes, algúns xa non  acabaron de lelo.   

 O libro é unha novela romántica. Atopámonos con Jennifer, a quen xustamente ao chegar á universidade, o seu noivo, Monty, pídelle unha relación aberta, polo que ambos teñen permitido estar con quen queira sen romper a súa relación. Ela está a entrar ao seu primeiro ano de universidade e cando entra á recepción da súa residencia, atópase con Chris, o vixiante (e irmán de Naya, quen será a compañeira de habitación de Jen), e Ross, amigo de Naya. Pois ben, Ross que  ía deixar aí as maletas da súa amiga, coñece a Jen e  pouco a pouco terminan enamorándose.

A partir deste momento a reunión do club resoltou moi dinámica pois empezamos a debatir a cerca das relacións abertas, con posturas a favor e en contra entre o mesmo alumnado. A maioría do profesorado opinamos que non había química  e tensión entre Jen e Ross.  A autora escribe e detalla moi ben os sucesos, pero a construción dos personaxes xunto co seu romance é moi frouxa .

Tamén tratamos o tema  das relacións tóxicas. Monty, o noivo de Jen trátaa moi mal, pero ela segue aí e incluso xustifica o seu comportamento. Iso é o peor das relacións tóxicas que moitas veces os que están nesa relación non se dan conta ou non queren darse conta de certas actitudes ata que xa é moi tarde.                                                                             

O final pareceunos un pouco dramático. Ela toma a decisión de regresar a súa casa xunto coa súa familia para que el cumpra o seu soño de continuar os seus estudos en Francia, pero nin tan sequera fala con el, abandónao sen máis .Era obvio que tomaría esa decisión pois pola contra, non habería libro dous.

Trala reunión decidimos a nosa próxima lectura, abandonando a temática "New adult" dos anteriores libros. A nosa próxima lectura será en galego e leva por título Aqueles días en que éramos malas de Inma López Silva.

                                         COMENTANDO ANTES DE DICIEMBRE

                                          A NOSA PRÓXIMA LECTURA

                                MEMBROS DO CLUB POSANDO COA NOSA PRÓXIMA LECTURA

 PRIMEIRA REUNIÓN DO GRUPO DE 1º E 2º DA ESO

 A primeira reunión deste grupo tivo lugar o día 19 de outubro e  o alumnado participante no Club escolleu como primeira lectura do curso Penúltimas tendencias de Carlos Negro publicado no ano 2014. Trátase dun diario dunha adolescente que, mediante o uso da poesía, pretende romper cos estereotipos de xénero e cos cánones de beleza que marcan a sociedade e os medios.

Nesta primeira reunión falouse do que suxería o título e a portada para cada un dos participantes. Posteriormente quedou fixada a data para comentar o libro, que sería o 17 de novembro.

                                                    PRIMEIRA LECTURA 

  SEGUNDA REUNIÓN DO GRUPO DE 1º E 2º DA ESO

O día 17 de novembro tivo lugar a segunda reunión deste grupo e nela  léronse os poemas do libro Penúltimas tendencias, que máis gustaron a cada un, reflexionando sobre os temas que plantexa o libro, traéndoos á actualidade e contextualizándoos na realidade do noso alumnado. Posteriormente, varias alumnas do club de lectura gravaron algúns dos poemas para emitir o 25 de novembro na radio escolar. 

A lectura deste libro foi do agrado do alumnado e xerou interesantes debates cos que, agardamos, se plantase unha semente crítica coas tendencias impostas pola sociedade.

Nesta reunión tamén se decidiu a seguinte lectura que será La tuneladora de Fernando Lalana.

                                             Posta en común da lectura

                                           Elección do segundo libro