SEGUNDA REUNIÓN DO CLUB DE PROFES

Despois do éxito da primeira xuntanza tiñamos ilusión por repetir a experiencia, pero no segundo trimentre foinos imposible encontrar unha data que nos fose ben todas. Despois de varios intentos, decidimos deixalo para o terceiro trimeste, e coincidiunos moi ben, porque a fixemos o 23 de abril, e así de camiño celebramos o Día do libro.

Desta vez o libro que eliximos foi El faro del silencio de Ibon Martín e, aínda que non gustou moito, deunos tema para o debate e para pasalo moi ben, como na anterior ocasión.

Esta vez xa deixamos elixido o libro de lectura Comerás flores, de Lucía Solla Sobral e o día de reunión, o 4 de xuño á hora de xantar. Así xa procuramos estar libres para ese día e non será tan dificultoso pórse de acordo. 

Estamos, ademais, convidados polos compañeiros do IES 12 de Outubro para acudir á súa reunión de club o día 20 de maio e van ler o mesmo título ca nos. Ese día devolverémoslle o convite para que participen eles na nosa reunión final. Será unha experiencia positiva e de convivencia entre centros, que non ten que ser a última.

Un momento durante a reunión, co libro de lectura:

SÉTIMA REUNIÓN DO GRUPO MIXTO DE 1º E 2º DA ESO

O luns 20 de abril reunímonos o club de lectura de 1º e 2º da ESO. Esta vez eliximos O achado do Castro de Manuel Núñez Singala.

É un libro moi divertido e fácil, para este terceiro trimestre que vén cargado de traballo e exames finais. Ademais, como é teatro, prestamos atención a un xénero distinto da narrativa e para a última reunión faremos unha lectura escénica no castro de Santomé, que temos aquí ben preto do noso Centro.

O alumnado durante a reunión, mostrando o libro elixido:

SÉTIMA REUNIÓN DO GRUPO MIXTO DE 3º E 4º DA ESO

 

O venres 10 de abril reunímonos o club de lectura de 4º da ESO para elixir libro para este terceiro trimestre. Xa quedaramos en que ía ser de poesía ou teatro, que son xéneros  menos presentes do que deberían nas nosas lecturas e nas da maioría da xente. Desta vez escollemos Passa-Montanhas, de Séchu Sende, un libro orixinal, que tamén se presta a facer actividades diferentes. 

Primeiro imos elixir tres poemas cada un, os que máis nos gustaron; logo quedarémonos con un, sen que se repita, para na última reunión gravar unha lectura deste con pasamontañas, tal e como propuxo o autor e realizou con varias colaboracións.

O alumnado durante a reunión

O alumnado mostra o libro 

O xoves día 16 de abril reunímonos a segunda parte do club, os de terceiro. Neste grupo non tiñan claro en principio se querían o mesmo que os seus compañeiros ou non, polo que puxemos varias opcións sobre a mesa.

Os membros do club con todos os libros que tiñamos para elixir encima da mesa.

Aínda que finalmente lles gustou a actividade que van facer os seus compañeiros de cuarto e decantáronse polo mesmo. Ademais así podemos facer unha reunión final conxunta, para pechar o ano lector.

Mostrano libro elixido

Como no resto das ocasións, se un bo libro vai acompañado de algunha lembetada, moito mellor!

SEXTA REUNIÓN DO GRUPO MIXTO DE 3º E 4º DA ESO

O mércores 11 de marzo reunímonos o club de lectura de 3º e 4º da ESO, tanto os que lían Martes con mi viejo profesor como Golpes de luz, posto que xa remataran todos ambas obras.

 

Como xa sucedera na reunión anterior gustoulles máis Golpes de luz, aínda que Martes con mi viejo profesor convida a reflexionar moito máis sobre o sentido da vida e outros temas transcendentais.

O alumnado durante a reunión:

O grupo é demasiado numeroso para facer reunións conxuntas, polo que para a seguinte reunión dividirémolo de novo en dous e cada un elixirá unha lectura diferente.

Ademais dos libros lidos tratamos o tema da actividade tradicional para poñer peche ao club, a comida de fin de curso. Como non nos concederon diñeiro suficiente este ano, decidimos facer da necesidade virtude e realizar un obradoiro de gravado e bordado de bolsas que venderemos posteriormente. Desta forma conseguiremos, un ano máis, comentar o último dos libros durante a sobremesa nun restaurante de Ourense.

SEXTA REUNIÓN DO GRUPO DE 1º E 2º DA ESO

 O 6 de marzo celebrouse a sexta reunión do grupo de 1º e 2º da ESO para comentar a segunda parte de Tras la sombra del brujo.

Esta vez o alumnado criticou a forma de proceder de Julen, que tiña unha moza en EEUU e sen dicirlle nada namorouse de otra e non respondía ás súas mensaxes. Non lles gustou moito o protagonista pola súa forma de proceder, identificábanse máis coa figura do avó.

Comentamos algúns aspectos da cultura dos masais, como o feito de servir en todo ao avó de Julen porque este lle salvou a vida e, o que resultou máis chocante para eles, que para buscar esposa a pagase cuns cantos animais domésticos.

Tamén comentamos a fuxida en todoterreo, a maldade do Brujo, a caza do león por parte do masai, que serve para desquitarse pola vez que estivo a punto de morrer devorado por un... E, por último, o tema do medio ambiente, que puxemos en relación co coidado da natureza na nosa contorna.

O alumnado durante a reunión:

Ao final tivemos que deixar o debate antes de que se nos esgotasen os temas porque tocou o timbre para ir a clases.

QUINTA REUNIÓN DO GRUPO DE 1º E 2º DA ESO

 O 28 de xaneiro celebrouse a quinta reunión do grupo de 1º e 2º da ESO para comentar a primeira parte de Tras la sombra del brujo.

O libro foi un éxito porque mantén moi ben a intriga e transcorre nun lugar exótico que se presta para o contraste entre culturas e modos de vida moi distintos. Julen acaba de chegar dunha grande cidade de EEUU ao Congo, e non precisamente a unha cidade, senón a unha zona habitada por tribos de masais. Alí o poder da natureza móstrase desde o principio con toda a súa fereza, cando un león devora a unha persoa do poblado. Os protagonistas terán que enfrontarse a un sinfín de perigos. Por un lado, a natureza indomable que fai que a supervivencia sexa unha continua loita; por outro, a acción do ser humano, que non ten escrúpulos en converter un paraíso natural nun vertedorio de residuos só por intereses económicos.

Non falta tampouco no libro o tema do amor que vai xurdindo entre Julen e Élodie, para acabar de enganchar ao lector adolescente. Polo tanto,  está gustando moito e quedamos todos con gana de acabar de ler as páxinas que nos faltan para saber se por fin conseguen rescatar a Élodie das gadoupas do malvado Buku e se a relación entre os dous mozos ten futuro. 

O alumnado asistente durante o debate:

QUINTA REUNIÓN DO GRUPO DE 3º e 4º DA ESO

 O luns 19 de xaneiro reunímonos co grupo de alumnos de 4º da ESO que está lendo Golpes de Luz, de Ledicia Costas, para comentar a primeira parte deste libro.

A lectura da novela está resultando, unha vez máis, moi atractiva para o alumnado. Desta volta, comentamos que o multiperpectivismo narrativo suaviza temas tan duros como o alzhéimer ou as drogas cando chegan a nós desde a mirada da avoa, sempre cargada de retranca e de humor.

Durante a reunión recordamos como a década dos 80 foi testemuña dunha das crises máis devastadoras do noso país: reflexionamos sobre o narcotráfico en Galicia, que actuaba como porta de entrada ás drogas desde diversos lugares de América; sobre a pouca información que se tiña sobre os efectos destas e falamos, tamén, dos narcotraficantes, que non estaban tan mal vistos naquela época e que viron na heroína un negocio moito máis proveitoso que o contrabando doutras substancias como o tabaco.

Unha semana despois, o mércores 28de xaneiro, reunímonos para comentar o segundo dos libros, Martes con mi viejo profesor

Como xa sucedera a anterior vez, gustou moito menos porque é un libro bastante profundo e filosófico, e eles considerárono triste e de narración lenta, con pouca ou case ningunha intriga. De feito asistiu menos alumnado á reunión, porque algúns non o leran. Porén, aqueles que o conseguiron fixeron unhas reflexións moi profundas e maduras sobre el: o que nos ensina sobre temas tan importantes como aprender a vivir e tamén a despedirse e morrer, a familia, a amistade, a importancia dos coidados e de vencer o orgullo e deixarse coidar...

Ao final, entre todos reflexionamos que foi un libro que pagou a pena, aínda que non nos divertiu demasiado, ensinounos moito. Hai libros que entreteñen, e outros que fan pensar.

O alumnado asistente durante o debate: